LAOAG CITY – Nagtultuloy ti ceasefire iti nagbaetan ti Israel ken Hamas idiay Gaza sakbay ti manamnama a pannakawaya-waya dagiti hostage nga Israeli ken dagiti balud a Palestino ken sakbay ti panagbitla ni United States President Donald Trump iti parliamento ti Israel.
Inbatad ni Israeli government spokesperson Shosh Bedrosian, namnamaen ti Israel a mangrugi a waya-wayaan dagiti hostage ita a bigat ti Lunes nga aggigiddan a maparuk-atan ti 20 a sibibiag pay nga hostage.
Kunana a nakasagana ti Israel nga awaten dagiti hostage no bilang mawaya-wayaanda ti nasapsapa.
Sarunoen met ti pannakawaya-waya dagiti bangkay ti nabatbati pay a 28 a natay nga hostage.
Kabayatanna, manamnama a sumangpet ni Trump idiay Israel ita a Lunes tapno agsarita iti Knesset — nailian a parliamento ti Israel — sakbay nga agbiahe nga agturong iti Sharm El Sheikh idiay Egypt para iti maysa a world leaders’ summit mainaig iti panaglippas ti gubat idiay Gaza.
Nangipaay met ti panagbitla dagiti envoy ni Trump nga isuda Steve Witkoff ken Jared Kushner iti maysa a rally idiay Tel Aviv idi Sabado a namnamaen ti naruay nga Israeli a daytoyen ti maudi a panawagan para iti pannakawaya-waya dagiti hostage ken panagngudo ti gubat.
