LAOAG CITY – Inpakaammo ni Ms. Mylene Isabel Pascual, mangidadaulo ti City Environment and Natural Resources Office a makikinnammayetda iti Bureau of Fire Protection ditoy siudad ti Laoag tapno mangiyuswat ti forum kadagiti umili tapno maliklikan ti uram.
Segun kenkuana, adu pay dagiti umili a saan a makaammo no kasano a maliklikan ti uram ken ania dagiti rumbeng nga umuna nga aramiden dagitoy no adda ti mapasamak nga uram.
Gapu iti daytoy, kunana nga adda ti forum a maiyuswat kaduada ti Bureau of Fire Protection tapno agtultuloy a mapakaammoan dagiti umili maipanggep kadagitoy a banag.
Inlawlawagna a babaen iti daytoy, agturong dagiti kameng ti Bureau of Fire Protection ken City Environment and Natural Resources Office iti kada barangay ken ditoy a maipakaammo dagiti nasken ken saan a nasayaat nga aramiden tapno maliklikan ti uram.
Innayonna a kasapulan dagitoy a maipalagip kadagiti umili gapu ta adu dagiti saan a mangserseryoso kadagiti pammalagipda iti publiko kas kadagiti nabaybayan-an a nakasaksak nga appliances, electrical wires a pamunganayan ti uram ken masansan a panagpuur kadagiti basura.
