LAOAG CITY – Mangiyuswat ti City Environment and Natural Resources Office ditoy ciudad ti Laoag ti panagsanay para iti panag-recycle ti gomgoma.
Segun kenni Mrs. Mylene Pascual, mangidadaulo iti nasao a pangopisinaan, dagiti daan a goma ket saan a gatangen ti junkshop isut gapuna nga imbes a nakatambak dagitoy ket mairecycle ken mausar iti sabali a wagas.
Inpakaammona a daytoy ket maysa kadagiti programa ti opisinada nga “Environmental sustainability and livelihood generation through recycling.”
Kunana a babaen iti daytoy ket makasursuro dagiti umili nga agrecycle kadagiti nagduduma a banag kas iti daan a goma a mapagbalin a lamisaan, tugaw, pagmulaan ken dadduma pay.
Mainaig iti daytoy, kuna ni Pascual a dakkel a tulong daytoy kadagiti umili gapu ta ti panagsanay ket mangipaay iti nagduduma nga adal.
Inayonna a kalpasan ti panagsanay ket adda ti maawat dagitoy nga starter kit tapno itultuloyda dagiti masursuroda.
Kabayatanna, ginutigot ni Pasual dagiti umili a makipartisipar iti nasao a training kangrunaana dagiti interesado.
