LAOAG CITY – Mapaayaban ti pannakabagi iti City Engineering Office ken Department of Public Works and Highways – 1st District Engineering Office inton sumaruno a session ti Sangguniang Panlungsod.
Daytoy ket kalpasan a napansin ni Sangguniang Panlungsod Member Roger John Fariñas ti aspalto iti rangtay ti bypass road ditoy siudad ti Laoag.
Segun kenkuana, adda ti panagamak dagiti residente a dumaldayasat iti nadakamat a rangtay gapu iti expansion joint a naikabil ken adda ti posibilidadn na nga agbalin daytoy a lubak-lubak.
Inabatadna a ti pannakaayab kadagiti nasao nga opisina ket tapno mailawlawag no usto a maperdi ti aspalto a naikabil gapu iti pannagaraw iti rangtay.
Mainaig ti daytoy, inpalgak ni Vice Mayor Rey Carlos Fariñas, nga idi napalabas a tawen ket adda ti kapada a pasaak iti Gilbert Bridge ditoy siudad.
Kinunana a gapu iti saan a pannakaaramid a nasayaat ti rangtay ket mabalin amangitunda daytoy ti “bumpy effect” wenno panaglubak.
Kabayatanna, kalikagum ti Sangguniang Panlungsod a mailawlwag daytoy a banag tapno saan a maulit ti napasamak iti Gilbert bridge ken maliklikan iti aniaman nga insidente.
