LAOAG CITY – Saan a namnamaen ni Cesar Montano a maawaw dagiti tattao ti kinapudno a naipenpen iti naunday a panawen seknan ti pakasaritaan ti Pamilya Marcos idi rimwar da iti Malakanyang.
Iti naiyuswat a media conference iti dakkel a mall iti ili ti San Nicolas dagiti cast ti pelikula a Maid in Malacañang nga inatendaran da Cesar Montano kas (President Ferdinand Edralin Marcos Sr.), Ruffa Gutierrez kas (First Lady Imelda Marcos), Cristine Reyes kas (Imee Marcos), Diego Loyzaga kas (Bongbong Marcos) kenni Ella Cruz kas (Irene Marcos), indilig ni Cesar iti role na kas Jose Rizal iti immuna a pelikula ket nabusbus na ti pito a bulan tapno adalen na ti role na.
Inbatad ni Cesar nga iti role na iti Maid in Malacañang kas Presidente Ferdinand Edralin Marcos ket arig nga awan pay makalawas ti panagsagana ken saan a nalaka daytoy.
Segun kenni Cesar, inawat na ti role iti nasao a pelikula gapu ti naipaay kenkuana nga oportunidad.
Innayon na a pakaidayawan na ti role kas Presidente Ferdinand Edralin Marcos.
Kabayatanna, inbatad ni Direk Daryll Yap a ti biggest misconception ti pamilya Marcos ket iti pannakaawag da a nadakes a tattao.
Patyen ni Direk Daryll, ket amin a tattao ket biktima ti panangmatmata babaen ti kabagyan, pagayam ken dagiti tattao a saan met nga am-ammo.
Daytoy ti gundaway a kitaen no addaan ti karbengan a husgaran ti sabali a tao kasta met iti bukod a bagi.
Inbatad na a ti pelikula a Maid in Malacañang ket maysa a testamento nga awan ti tao a nairanta a nadakes.
Kabayatanna, iti panagsarita ni Ella Cruz, nga iti role na ket ni Irene Marcos, inpeksa na ti inspirasyon na keni Sen. Imee Marcos nangruna idi naan-anay a naam-ammo na daytoy.
Kuna na a madandanagan idi umuna a gundaway gapu a mabuybuya nalaeng iti damdamag ngem idi naan-anay a naam-ammo na ket arig a maysa laeng a gagangay a tao.
Inlawlawag ni Ella a managayat ti Senadora, kanayun a naragsak ken ammo na ti makiangaw ken agistorya.
Segun kenni Ella, saan na a narikna idi nakasango na ti senadora nga anak ti dati a presidente ken kabsat na ni Presidente Ferdinand Marcos Jr. gapu ta narikna a kapantay da laeng daytoy.
Innayon na a nainspirar kenni Senador Imee nangruna idi nakawaat ti naruay a pannaka bash na gapu ta ti senadora ket nagtalinaed a natibker iti baet nga ad-adu pay dagiti nangbash kenkuana iti uneg ti sumagmamano a dekada.
Kabayatanna, umaboten ti nasurok 100 a milyon a pisos ti nasapulan ti pelikula rason a ginutigot dagiti cast ti publiko nga agbuya iti Maid in Malacañang.
