LAOAG CITY – Ginutigot ni Hon. Jonathan Torralba, chairman ti committee on agriculture ti Sang. Panlalawigan dagiti mannalon a mangipakaammo a dagus iti City wenno Municipal Agriculture Office dagiti nadadael a mula da gapu iti iduduprak dagiti bagyo ditoy probinsia.
Inlawlawagna a daytoy ket gapu ta adda ti pagalagadan ti Phil. Crop Insurance Corp. a saanda a mangipaay ti insurance kadagiti nadadael a mula dagiti mannalon no naglabesen iti duapulo nga aldaw ti pannakaipadanon kadakuada iti report dagiti mannalon iti kaadda dagiti nadadael a mula dagitoy kalpasan ti ipapanaw ti bagyo iti maysa a lugar.
Imbatadna a ti gagangay a pakakuentaan ti maipaay nga insurance ket no mano nga aldaw ti mula ken no kasano ti langa dagitoy kalpasan ti bagyo.
Mainaig iti daytoy, inbunannag ni Torralba a sinuratanna ti regional director ti Phil. Crop Insurance Corp. a nangkiddawanna nga agatendar daytoy iti regular session ti Sang. Panlalawigan tapno ilawlawagna a mismo no ania ti pagrukudan iti panangkuenta ti maipaay nga insurance dagiti mannalon kalpasan ti nagsasaruno a bagyo a nangduprak iti probinsia.
Kabayatanna, inpakaammo ti bokal a dakkel ti pammatina a kaaddoan kadagiti mannalon ditoy Ilocos Norte ti nakaiparehistro kadagti mulada iti Phil. Crop Insurance Corp. a kas iti kanayon nga ipagpaganetget ni Gob. Matthew Marcos Manotoc kadakuada apaman ti panagsursursurna kadagiti nagduduma a lugar ditoy probinsia.
