LAOAG CITY – Kalikagum ni Sangguniang Panlalawigan Member Atty. Saul Paulo Lazo, ti Chairman iti Committee on Education ti pannakaipatungpal ti skeletal force dagiti mangisursuro kadagiti pagadalan iti baet ti kinabara ti panawen.
Daytoy ket kalpasan nga adda ti kiddaw dagiti sumagmamano a nagannak a saanda a kabaelan a matutukan dagiti annakda nga agbasa iti uneg ti pagtaenganda gapu iti pakakumikumanda ken dagiti trabaho dagitoy kabayatan ti pannakaipatungpal ti Modular Distance Learning.
Gapu iti daytoy, segun ken ni Atty. Lazo a masapol a maadal a naimbag ti Department of Education ditoy Ilocos Norte ti kasayaatan a wagas tapno masolbar dagiti parikot dagiti nagannak a saanda a mabantayan dagiti annakda a mabati nga agbasa nga awan ti kaduada.
Inbatadna a naiget ti panangadal ita ti Department of Education maipanggep ti pannakaisubli ti dati nga School Calendar a manipod iti bulan ti Hunio agingga Marso tapno maliklikan ti kinabara ti panawen.
Kunana nga adda ti maad-adal a pannakaestablisar ti Learning Hub nga open area tapno saan a mapupuk iti pudot dagiti agad-adal iti klasrum ngem masapol ti naiget a panangtingitingda iti daytoy.
