LAOAG CITY – Nakigtot ti Chairman ti Committee on Tourism ditoy siudad ti Laoag iti naimatangana nga adda ti nadadael a paset ti Watch Tower iti Barangay Gabu Sur.
Inlawlawagna a no arigen ket bassit laeng a tudo ket mabalin a madadaelen ti nasao a baro a tourist spot ditoy siudad.
Inbatadna a basar iti pannakisarsaritana kadagiti opisial iti nasao a barangay nga intunda daytoy iti napasamak a ginggined idi bulan ti Enero ita a tawen.
Gapu iti daytoy, kiniddaw ti opisial nga adda ti maisayangkat nga emergency repair iti maibilang nga historical site ditoy siudad ti Laoag.
Mainaig iti daytoy, basar iti City Tourism Office nga adda ti nailatang a maysa a milyon a pisos para iti restoration budget daytoy a rumbeng a mausaren ken maipatungpal ti proyekto iti kabiitan a panawen.
Kabayatanna, nangipasa ti Sangguniang Panlungsod ditoy siudad ti surat iti Local Chief Executive, City Engineering Office ken City Tourism Office tapno ipakaammo daytoy a banag.
