LAOAG CITY – Kinumpirmaran ni Mr. Enrico Aurelio, Chairman ti GLEDCO nga innem a bulanen a saan a nagiremit ti Laoag City General Hospital iti bayad ti loans dagiti empleado ti nasao nga ospital a naik-ikkat iti sweldo da.
Segun kenni Aurelio, umaboten ti 3 milyon a pisos ti saan a nabayadan ti LCGH iti GLEDCO a loans dagiti empleado.
Naamoan nga idi mapan koma ag-reloan dagiti sumagmamano nga empleado ti LCGH ket saan a naaprubaran ti aplikasyon da gapu ta naduktalan a saan a nairemremit dagiti maik-ikkat iti sweldo da a pagbayad da koma iti utangda.
Basar ti report, 95 a porsyento dagiti empleyado ti ospital ket miembro ti GLEDCO ken adda ti loans da.
Inlawlawag ni Aurelio a dagus nga ikkaten ti Accounting Section ti bayad da sakbay a maideposito dagiti swledo dagiti empleado iti bangko.
Kunana nga awanen ti cash backing ti LCGH gapu ta agkurkurang ti koleksyon da isut gapuna a dagiti mairemit koma iti GLEDCO ket isu paylaeng ti us-usarenda a pagpasweldo kadagiti empleado.
Kabayatanna, impetteng ni Dr. Francisco Dacuycuy, dati a Chief of Hospital nga awan ti ammo na iti daytoy nga isyu gapu ta ti ammo na ket mairemremit amin iti bangko ken iti GLEDCO dagiti maik-ikkat iti sweldo dagiti empleado a nairanta a pagbayad da koma iti loans da.
Inadmitir met ni Mr. Jim Bryan Ranada, mangidadaulo ti Accounting Section ti LCGH a saan da pay a nakabayad iti innem a bulan gapu ta agkurkurang ti koleksyon da.
Inkalintegan na a daytoy ket gapu iti adu a diskwento nga ipapaay ti ospital, pinagkurkurang ti doktor ken equipments a nadadael ti Bagyo Ompong.
Mainaig ti daytoy, mamati ni Dr. Eliezer Asuncion, baro a mangidaulo ti LCGH a saan a mapukpukaw dagiti naikiskissay iti sweldo dagiti nagloan nga empleado no di ket nausar dagitoy kadagiti prayoridad a bayadan ti ospital.
Innayon na a mangiyuswat da ti taripnong intono Agosto 6 tapno pagsasaritaan da daytoy nga isyu.
