LAOAG CITY – Naiget a naglikudan ni House Justice Committee Chairperson ken Batangas 2nd District Representative Gerville Jinky Luistro ti alegasyon nga adda dagiti agpanpanday linteg a maipagarop a nangidiaya ti pondo wenno pasuksuk kasukat ti botos da iti impeachment kontra ken ni Vice President Sara Duterte.
Segun ken ni Luistro, awan ti naawat na nga aniaman a panaggandat manipod iti liderato ti kamara de representantes tapno maimpluwensyaan ti wagas ti panagbotos iti komite.
Ti isyu ti pasuksuk ket immunan a dinakamat ni Navotas Rep. Toby Tiangco, ngem dagus a nagkedkedan ti dadduma pay a miyembro ti komite kas ken ni Manila Rep. Joel Chua.
Inpetteng ni Luistro, a nupay naipagagangay a political process ti impeachment, naibasar paylaeng daytoy iti ebidensya ken pagsungsungbatan iti publiko.
Iti agdama, agptultuloy ti deliberasyon iti Kamara de representantes kadagiti reklamo nga impeachment kontra ken ni Duterte, a nakatutuk iti maipagarop a saan nga umiso a pannakausar ti confidential funds idi daytoy ti sekretaryo ti Department of Education.
Ti nasao nga isyu ket mangitunda ti naiget nga atensyon iti publiko, aglalo ket nagtalinaed a sensitibo ti political climate iti pagilian.
Iti baet dagiti alegasyon, inpasigurado ni Luistro nga agtalinaed a patas ken transparent ti proseso ti komite.
