LAOAG CITY – Kinumpirmaran ni Fire Sr. Insp. Ronald Castillo, fire marshal iti Bureau of Fire Protection ti napasamak nga uram iti uneg ti maysa a apartment ti pagtaengan iti Brgy. 27 Nuestra Seniora de Solidad ditoy siudad ti Laoag.
Kuna na a napasamak ti uram bayat ti pannakaicharge ti vape wenno electronic cigarette iti kuarto na idi ta pinanawan met ti akinkukua iti nasao a banag tapno agbuya iti telebisyon.
Segun kenni Castillo, possible a na-over charged ti baterya ti vape rason a pimmutok daytoy a poon a nauram ti fome a pagid-iddaan ti maseknan no sadinno a nakaidisoan ti baterya ti vape.
Nupay kasta, dagus met a nasebseban ti uram babaen ti panagusar ti fire extinguisher dagiti maseknan nga agnanaed iti apartment.
Gapu iti daytoy, nagpalagip ni Castillo iti publiko a bantayan dagiti maisaksaksak a gadget ken saan kuma a panpanawan.
Innayon na a no bilang pimmawa wenno rimwar iti pagtaengan ti akinkukua iti vape ket possible a dakkel manen nga uram iti rinespondean da idi kalman.
