LAOAG CITY – Inrakurak ti Malakanyang a saan da pay a napagsasaritaan ti Charter Change (Cha-Cha) wenno proseso ti panangamendar iti 1987 Constitution.
Segun ken ni Palace Press Officer USec. Atty. Claire Castro, iti naudi a pannakitaripnong ni Presidente Ferdinand Marcos Jr. iti economic team na ket saanda pulos a nadakamat ti Cha-Cha.
Kuna na a nakatutok ni Presidente Marcos Jr. iti panangpadur-as ti ekonomiya ti pagilian.
Nupay kasta, kuna ni USec. Castro, a no bilang addan ti maaramid nga addang dagiti agpanpanday linteg mainaig iti nasao nga isyu ket adalen daytoy ti presidente.
Inaramid ti Palace official ti nasao a rakurak kalpasan ti pronouncement ni Senate President Vicente “Tito” Sotto III a suportaran na dagiti plano tapno maamendaran ti 1987 Constitution no mailungalong daytoy.
Daytoy ket kalpasan a pinatibker ti Korte Suprema ti ruling na a nangideklarar kas unconstitutional ti Articles of Impeachment kontra ken ni Vice President Sara Duterte.
Segun ken ni Sotto, nalawag a maipagarop a pannakibiang iti bileg ti lehislatura ti pannakibibiang ti Korte Suprema iti proseso ti impeachment nga ibilang na nga eksklusibo a trabaho ti Kongreso.
Inpetteng pay ti senador a gapu iti nasao desisyon ket arigna inamendaran metten ti Korte Suprema ti konstitusyon.
