LAOAG CITY – Inbaga ni Mayor Rene Gaspar iti ili ti Carasi nga adda ti panagamak da gapu ta asideg laeng iti ili da ti Barangay Lipay iti ili ti Solsona nga apektado metten iti African Swine Fever (ASF) virus.
Kuna ti mayor a ti kangrunaan a problema da ket ado dagiti mabalin a pagnaan a sumrek iti ili da ngem ikarkarigatan da a bantayan amin.
Inbatad na pay a kinataripnong da metten dagiti kabarangayan da nga agtartaraken ken agparparti iti baboy a no adda ti madlaw ken makita da a sintomas ti ASF virus kadagiti taraken da a dingwen ket ireport da a dagus kadakuada.
Binalakadan na pay dagiti umili a saan da pay laeng a mapan aggatang wenno agiserrek ti karne ti baboy manipod iti ili ti Solsona tapno masigurado a saan a makastrek iti ili da ti ASF virus.
Innayon na a kasarita na ti Municipal agricultural officer iti ili ti Carasi para iti pannakaiwayat ti checkpoint kadagiti mabalin a pagnaan a sumrek iti nasao nga ili tapno mabantayan da dagiti rumuar ken sumrek.
