LAOAG CITY – Naiyestablisar a dagus dagiti entrance ken exit points kadagiti amin a purok iti Brgy. 17-San Felipe iti ili ti Sarrat.
Daytoy ket kalpasan a nangiyetnag ni Mayor Remigio Medrano iti nasao nga ili ti Executive Order No. RBM 2020-070 seknan iti pannakaipan ti lockdown iti Brgy. 17 ken dagiti kabangibang na a barangay
Segun ken ni Brgy. Kagawad Kristopher James iti iti nasao a barangay, naiwaras a amin a tanod ken isuda nga opisyal tapno agbantay kadagiti checkpoints iti barangay da.
Kuna na a daytoy ket tapno mamonitor dagiti kabarangayanda ken maliklikan ti ad-adda a panagwaras ti virus.
Mainaig iti daytoy, kuna ni James nga agtultuloy ti contact tracing da kadagiti sabsabali pay a nakapulapol dagiti nagpositibo.
Innayun na a manamnama nga intuno bigat a maituloy ti swab testing dagiti amin a nakapulapol dagiti immunan a nagpositibo iti barangayda.
Maipalagip nga adda ti uppat a nagpositibo iti virus iti Brgy. 17-San Felipe pakairamanan ti pimmusay a ni IN-C235.
Karaman a naipan iti lockodwn a barangay iti ili ti Sarrat ket ti Brgy. 18-San Isidro malaksid iti Sitio Gusod, Brgy. 16- Sto. Santiago malaksid iti Sitio Guidday ken Brgy. 13-San Pedro kalpasan a nakapulapol dagiti sumagmamano a residente dagiti immunan nagpositibo iti Brgy. 17
