LAOAG CITY – Nagpartuat ti maysa nga espesial a chewing gum dagiti scientist idiay Finland ken Estados Unidos a kabaelanna a labanan dagiti virus kas ti flu ken herpes.
Basar iti baro a panagadal, daytoy a gum ket naaramid iti pinulbos a tulang ti lablab bean ken addaan ti natural a protina a maaw-awagan kas FRIL a kabaelanna nga ag-neutralize kadagiti virus.
Daytoy a gum ket maysa a breakthrough iti medisina gapu ta ti simple a chewing gum ket mabalin a mangipaay ti proteksion kontra kadagiti virus a masansan a mangitunda ti sakit.
Para kadagiti eksperimento, napaneknekan a ti gum ket epektibo iti panagbaba ti viral load ti flu ti sumurok 95 a porsiento. Para met iti herpes virus, basbassit laeng ti kasapulan nga FRIL.
Segun kadagiti eksperto, ti gum ket natalged nga usaren ken kabaelanna nga agpaut agingga ti 800 nga aldaw a saan a maperdi weno maikkat ti bileg daytoy.
Malaksid iti daytoy, ti gum ket sumaruno kadagiti high standards dagiti agas ken taraon isu a sigurado a natalged para iti salun-at.
Ti ideya ti gum ket nabukel idi kangitingitan ti COVID-19 pandemic kas solusion iti panagwaras dagiti virus iti katay.
Iti balligi ti eksperimentoda, mangnamnama dagiti scientist a mangrugin ti human trials ken padasen pay ti gum kontra kadagiti dadduma pay a narisgo a virus kas ti bird flu ken dadduma pay a klase ti herpes.
Naammoan a no agballigi dagiti sumaruno nga eksperimento, posible nga agbalin a dakkel a tulong ti gum iti pannakapasayaat ti salun-at ken maliklikan dagiti virus a narigat a maagasan.
