LAOAG CITY – Inlawlawag ni Dra. Mary Anne-Luis, ti chief of clinic iti Laoag City General Hospital (LCGH) ditoy ciudad ti Laoag no apay nga adda ti panagdudua da iti libre nga hemo-dialysis machine nga inpabulod ti Medcore.
Ti Medcore ket isu ti kompanya a pakipinnirmaan koma ti gobierno lokal ditoy ciudad ti Laoag ti Memorandum of Agreement (MOA) para iti re-agent dagiti usaren a hemo-dialysis machine.
Maipalagip nga inbabawi ti nasao a kompanya ti panangipabulud da ti nasao a makina babaen iti panagsurat da iti konseho ditoy ciudad ti Laoag.
Nupay kasta, mamati ni Luis a kayat laeng ti kompanya ti lumiklik gapu ta saan da pay a naited iti ospital dagiti kasapulan a dokumento para kadagiti tallo a hemo-dialysis machine.
Karaman ditoy ti calibration certificate, installation certificate, warranty certificate ken dadduma pay a kasapulan koma ti LCGH apaman a naideliver dagiti nasao a makina.
Malaksid iti daytoy, adda pay ti panagdudua ti ospital iti nailanad a petsa iti calibration certificate, installation ken dadduma pay.
Kabayatanna, inpetteng ni Luis nga awan ti self-interest na ti panangkwestyunar na ti hemo-dialysis machine nga inpabulod ti Medcore iti LCGH a nangitunda ti panangibabawi ti nasao a kompanya kadagiti makina.
Sungbat daytoy ni Luis iti naipadanun iti Bombo Radyo Laoag a kalpasan a nagbabawi ti Medcore a mangipabulod iti nasao a makina ket maipagarop nga isuna metten ti makaammo para iti pannakagatang dagiti maisukat a hemo-dialysis machine.
