LAOAG CITY – Nagkedked ni Police Lt. Col. Rafael Lero, ti chief of police ditoy ciudad ti Laoag a nanginagan iti pulis a nangiturong ti maysa a kotse a nakadungpar kadagiti tallo a naglulubbon iti motorsiklo iti national highway a paset ti Barangay 13 ditoy ciudad.
Inbaga ni Lero a basar iti imbestigador da, ti kotse nga inturong ti pulis ket agpapa-amyanan a direksyon ken agawid koma iti ili ti Vintar idi makadinnungpar na ti kasabat na a motorsiklo a nagluganan ti dua a babai ken maysa a lalaki.
Gapu iti napasamak ket nagsagaba ti sugat kangrunaan na iti saka dagiti nakamotorsiklo ken naitaray da iti Governor Roque Ablan Senior Memorial Hospital (GRASMH) ditoy ciudad ti Laoag para iti naan-anay a pannakataming da.
Saan met a nasaktan ti pulis a nangiturong ti nangisit a Black Sedan.
Inbatad ni Lero a ti driver ti motorsiklo ket awan ti lisensya na ken agpapada da a tallo nga awan ti suot na nga helmet.
Kinumpirmaran pay ti opisyal a ti nangiturong ti kotse ket nakainom ti nasanger basar iti idadalan na ti breath analyzer iti ospital.
Inpakammo ni Lero nga addan ti immuna a pannakisarita dagiti nagannak kadagiti nakamotorsiklo sadinno a kiniddaw da ti tulong ti pulis para iti pannaka-ospital dagiti annak da.
Innayon na nga inbilin na iti imbestigador da a maikkan amin ti citation ticket dagiti involved iti desgrasya gapu ta adda da pay laeng iti ruwar idinto a nadanunen ti curfew.
Mainaig iti daytoy, kuna ni Lero a basar iti inisyal nga imbestigasyon ket rumrumuar a ti kotse ti immagaw ti linya ti nakamotorsiklo, ngem iyuswat da pay ti naun-uneg nga imbestigasyon tapno maamoan no kasanu a napasamak ti insidente.
