LAOAG CITY – Nareliboan ni Police Lt. Col. Reynaldo Michael Agoncillo II, ti chief of police ti PNP-Batac kalpasan inisyal a panagimbestigar ti Ilocos Norte Police Provincial Office (INPPO) seknan iti alegasyon kontra kenkuana ken dagiti kakadwa na a pulis.
Kinumpirmaran a mismo daytoy ni Pol. Col. Christopher Abrahano, ti Acting Provincial Director ditoy Ilocos Norte.
Daytoy ket seknan iti maipagarop a panaggi-inom ti hepe ken dagiti kakadwa na iti maysa a restobar iti Barangay Billo-ca iti ciudad ti Batac.
Segun kenni Abrahano, nakita dagiti imbestigador nga adda ti liway ti hepe mainaig iti daytoy.
Nupay kasta, kuna ni Abrahano nga agtultuloy latta ti imbestigasyon da seknan iti daytoy ket inpasigurado na a patas ti iyuswat da a panagimbestigar no sadinno a maikkan ti tyansa ni Agoncillo nga agpalawag.
Karaman kadagiti imbestigaren da a nalaing ket ti maipagarop a panangdangran dagiti kameng ti pulis iti maysa nga entertainer iti nasao a restobar..
Mainaig iti daytoy, kuna ni Abrahano a no mapaneknekan a pudno dagiti alegasyon ti nagreklamo kontra kadagiti kameng ti pulisya ket sumango da ti kaso administratibo ken mabalin a maikkat iti serbisyo.
Kabayatanna, inpasigurado pay ni Abrahano ti proteksyon dagiti nagreklamo ken binalakadan a saan da nga agbutbuteng nangruna no pudno ti alegasyon.
Kabayatanna, inbatad ni Agoncillo a saan na nga ammo no apay a nairaman ti nagan na iti alegasyon a napan da naggi-inom iti maysa a restobar ken ti maipagarop a panangkabil da iti maysa nga entertainer.
Segun kenni Agoncillo, saan a rimwar iti istasyon da ken bayata a napasamak ti riribok ket adda iti opisina da ti hepe ken kasarsarita na ti asawa na.
Inpetteng pay ti hepe a saan da a mapmapan iti restobar gapo ta daytoy ti naiget a pammilin na kadagiti adda iti babaen na.
Inlawlawag na pay nga awan ti am-ammo na iti nasao a restobar no diket timmawag laeng ti manager ti pasdek ken inreport na nga adda ti mapaspasamak a riribok.
Kuna ni Agoncillo a napan nagresponde dagiti pulis ken naurnos met laeng ti riri dagiti dua a babbai nga adda iti pasdek.
Ummuna iti daytoy, inakusaran ti entertainer dagiti pulis a nagturong dagiti walo a kameng ti PNP Batac iti nasao a bar bitbit da ti uppat a bote ti kwatro kantos ken dua a bote ti bilog a gin ken iti parbagon ket nakita na a kellaat nga adda ti mapaspasamak a panagririri iti nagbaetan dagiti pulis ken dagiti katrabahoan na a guest relation officer (GRO) a kinasango da a naginom.
Basar pay iti alegasyon, nagtutulungan a kinabkabil dagiti uppat a pulis ti entertainer.
Agtultuloy met ti imbestigasyon ti Ilocos Norte Police Provincial Office (INPPO) mainaig iti nasao a pasamak.
