LAOAG CITY – Inbatad ni ABC Federated Presidente Elmer Faylogna, Chairman Committee on Transportation a masapol a maiyimplementar ti RA 11229 wenno ti child safety motor vehicle act.
Nu pay kasta, kuna na a narigat a maiyimplimentar daytoy ita a panawen ti pandemiya gapu ta adu dagiti naapektaran ti pagsapulanna.
Inbunannag na nga ita a panawen ket nayun a padagsen kadagiti agiturturong ti lugan ti nasao a linteg nangruna ket adda ti multa dagiti saan nga agtungpal.
Mainaig iti daytoy, kuna na a masapol pay ti nalawlawa nga information dissemination wenno maipakaamo a nasayaat kadagiti tattao ti kaipapanan ti nasao a linteg sakbay a maiyimplimentar.
Kabayatanna, inpasingked ni Faylogna a ti nasao a linteg ket adda ti maited na a pagsayaatan gapu ta masalwadan dagiti ubbing nu bilang adda ti degsrasya.
Maipalagip nga epektibo ti Child Safety In Motor Vehicles Act idi Pebrero 2 nu sadino a daytoy ti mangi-require a dagiti agtawen ti 12 agpababa nga addaan ti katayag a nabbaba ngem 4”11 ket saan a maipalubos nga agtugaw iti front seat nu di ket masapol nga agtugaw dagitoy iti child restraint systems (CRS) wenno ti car seat a maiyannatop iti tawen, dagsen ken tayag dagiti ubbing.
Nu pay kasta, ado dagiti nagreklamo iti daytoy agsipod ta saan laeng a padagsen nu di ket mangparigat pay iti panagtugaw dagiti ubbing iti uneg ti lugan.
