LAOAG CITY – Kinumpirmaran ni Defense Secretary Gilberto Teodoro nga agus-usar ti People’s Liberation Army ti China ti trolls tanpno maimpluwensiaan ken makaiwaras ti propaganda dagitoy.
Daytoy ti inrakurak ti sekretario iti baet ti panagdengngeg ti Department of National Defense budget inton 2027 no sadinno nga inpadanon ni Finance Committee Chairman JV Ejercito ti panagdanag mainaig iti posible a propaganda dagiti gangannaet tapno pagririen ken magudua dagiti Pilipino.
Ti nasao a concern ti opisial ket namunganay kalpasan a nakaawat ti naruay a komento ti post-na iti social media a sinungbatanna ni Chinese Ambassador Jing Quan iti pagsasao a Mandarin.
Kunana a makita nga adda ti sumagmamano a Pilipino a kumanunong iti ambassador.
Inbatad ni Teodoro nga adda dagtii aktibidad a propaganda nga adda ti gagem a guduaen ti pagilian ken daytoy ket paset ti United Front Work a maysa kadagiti pundasion ti Communist Party ti China.
Nagballaag met ni Teodoro a no saan nga ikalintegan ti Pilipinas kontra iti rakurak ti China ket agbalin laengen a gagangay daytoy ken posible nga ibaga nga inawaten ti pagilian gapu ta saan man laeng nagtignay tapno ilaban ti karebbengan.
