LAOAG CITY – Inpetteng ni Taiwan President Lai Ching-te nga awan ti karbengan ti China a dusaen dagiti kadaraan da gapu iti pammati wenno adbokasiya da.
Immunan a binallaagan ti China dagiti mangsupsuporta iti panagwaywayas ti Isla a sumango da ti dusa a patay.
Nupay kasta, inpetteng ni President Lai nga awan ti karbengan ti China i-pursue ti cross-border prosecution iti umili ti Taiwan.
Inpaganetget na pay a saan a ti demokrasya ti nangrugyan ti krimen no di ket awtokrasya.
Nagballaag pay ni Lai a mabalin nga ad-adda a kumaro ti relasyon iti nagbaetan ti dua a partido no saan a bigbigen ti China ti existence ti Taiwan ken saan a mangiyuswat ti dayalogo iti gobierno ti Taiwan a lehitimo ken naelektaran iti demokratiko a wagas.
