LAOAG CITY – Plano ti China a mangipasdek ti maysa nga istruktura iti nagbaetan ti Pag-asa Island ken Subi reef iti West Philippine Sea iti gagem daytoy a baliktaren ti desision iti 2016 Arbitral award a mangikkat ti bileg iti claims ti China.
Daytoy ti rumrummuar a rason no apay agar-aramid ti estoria ti China maipapan iti West Philippine Sea karaman ti claim ti Chinese embassy a maipagarup nga inaprobaran ti Department of National Defense ken National Security Council ti maysa a new model wenno common understanding iti China maipanggep iti resupply mission ti Pilipinas para kadagiti nakaistasyon a tropa ti pagilian iti BRP Sierra Madre iti Ayungin shoal.
Nupay kasta, naglikudan daytoy ti opisial ken kinunana nga awan ti kinapudnona, nakakatkatawa ken linuluko laeng daytoy.
Inlawlawag ti opisial a kalpasan ti courtesy call ti Chinese Ambassador iti opisina daytoy iti umuna a paset ti napalabas a tawen, saanna pay a nakasarita ti asinoman nga opisial manipod iti Chinese Embassy a direkta wenno saan a direkta tapno talantanen ti aniaman a katulagan maipapan iti karebbengan ken nakadawyan a resupply operations iti Ayungin Shoal.
Inpettengna a ti laeng Presidente ti addaan ti bileg wenno otorisado a sumrek iti aniaman a klase ti katulagan.
Saan met a naipalubos wenno agaramid ti aniaman a gakat ni Año wenno asinoman nga opisial manipod iti National Task Force for West Philippine Sea tapno ikompromiso ti nailian nga interes manipod kadagiti ahente ti gangganaet a pagilian nga aktibo a makipaspaset iti panangperdi kadagiti teritorio ken kabaybayan.
Saan a mai-entertain dagiti gakat a kangrunaan a maibasar iti iligal ken ar-aramid laeng pakairamanan ti 9 wenno 10 dash line ti China.
Nasken nga ipalagip iti Chinese Embassy a saanda a maallilaw dagiti Pilipino kadagiti maar-aramid nga estoria ken saan a pudno a panagsinnukat ti komunikasion tapno laeng suportaran ti illegal claims daytoy iti teritorio ti Pilipinas kasta pay a maikkan ti nainkalintegan ti iligal, agresibo ken makapaallilaw a tignay daytoy kangrunaanna kadagiti insidente iti West Philippine Sea karaman ti panangtutok ti military-grade lasers, panangbomba ti water cannons, napeggad a pananglapped ken panangdungpar kadagiti barko ti Pilipinas a nangitunda ti injuries iti biang ti pagilian.
Inbatad ni Año a nagaramid pay ti chat group ti Chinese embassy karaman dagiti napili a miembro ti media tapno manipulaen dagiti impormasion.
Gapu iti nalawag a fake news ken disinformation ti arrangement story ti China, daytoyen ti maudi a gundaway nga agkomento ni National Security Council Adviser Año iti nasao nga isyu gapu ta ti mismo Presidente ti nangibaga a no bilang man nga adda ti katulagan ket ibabawinan ken maikkaten ti bileg daytoy.
Kabayatanna, kunana nga inton sumaruno a mangiruar ti Chinese Embassy ti fake news ken disinformation ket kidkiddawen ti National Security Council kadagiti amin nga ibilang ti claims ti China kas maysa pannakasayang laeng ti oras.
