LAOAG CITY – Nagballaag ti Ministro ti Depensa ti China maipapan iti maipagarup a “limitasion” iti pananglapped ti Beijing iti West Philippine Sea kagiddan ti serye dagiti panagsango iti nagbaetan dagiti lugan a pangbaybay ti China ken Pilipinas nga asideg iti mapagin-innagawan a lugar.
Dagiti lugan a pangbaybay ti China Coast Guard ket nagusar ti water cannon kontra kadagiti bangka ti Pilipinas nga adu a daras iti mapagin-innagawan a baybay nga arig amin a paset ket al-alaen ti Beijing.
Adda pay dagiti nairekord a panagdinnungpar a nakasugatan dagiti sumagmamano a Pilipino.
Kabayatanna, naminsan manen nga inrakurak ni United States Defense Secretary Lloyd Austin III a ti inkari ti Amerika a mapagtalinaed a nakalukat ken libre ti intero a West Philippine Sea.
Saan met a dinakamat ni Austin ti China ngem kunana a ti agtultuloy a panag-harass iti Pilipinas ket maysa a narisgo a tignay.
Innayon pay ni Austin a ti Estados Unidos ket agdama nga agus-usar kadagiti teknolohia ken panagsanay tapno itandudu ti kinakappia iti West Philippine Sea.
