LAOAG CITY – Kinumpirmaran ti Philippine Coast Guard (PCG) nga iti umuna a gundaway ket nagusar ti China ti Long Range Acoustic Device (LRAD) tapno i-harass ti barko ti Pilipinas iti West Philippine Sea.
Basar iti Philippine Coast Guard, masansan nga agus-usar ti China ti water cannons ken dagiti napeggad a manuevers tapno mabuteng ti barko ti pagilian.
Inbatad ni Philippine Coast Guard spokesperson for the West Philippine Sea Commodore Jay Tarriela, nagusar ti China ti Long Range Acoustic Device (LRAD) a maysa nga specialized loudspeakers a mabalin a mangiruar ti nangato a lebel ti tagari a mangitunda ti pannakaperdi ti eardrums ken ti permanente a panagbalin a sulpeng.
Kangrunaan a dinakamat ni Tarriela ti China Coast Guard vessel nga addaan ti hull number 3103 ti nagusar ti Long Range Acoustic Device tapno i-harass ti BRP Cabra (MRRV-4409) tapno lappedanna ti panagasideg iti daytoy.
Kuna ni Tarriela a sinuktan ti CCG-3103 ti CCG-3304 tapno iligal nga agpatrolya iti paset ti exclusive economic zone ti Pilipinas.
Iti baet ti pananghar-harass ti China Coast Guard saan a nagbuteng ti BRP Cabra ti Philippine Coast Guard.
Agtultuloy ti maiwaywayat nga addang ti BRP Cabra tapno maliklikan a makastrek iti coastline ti Zambales.
Kabayatanna, agtultuloy pay ti panangipaay ti radio challenge ti Philippine Coast Guard iti China Coast Guard ken kunada a ti presensiada ket maikanniwas iti Philippine Maritime Zones Act ken United Nations Convention on the Law of the Sea (UNCLOS).
