LAOAG CITY – Maysa a siudad idiay China ti nakagun-od ti baro a world record kalpasan a nakaaramidda ti kadakkelan a lantern iti intero a lubong.
Kinumpirmaran ti records keeping organization a Guinness World Records a ti Luoyang City idiay China ti baro a world record holder ti titulo a “Largest Standing Lantern.”
Daytoy ket kalpasan a nakabukelda ti lantern nga agsukog peony nga adda ti kadakkel a 45.03 meters in length, 19.7 meters in width, 24.84 meters in height.
Daytoy ket kas kadakkel ti building nga addaan ti walo a kadsaaran.
Ti mismo lantern ket addaan ti kadagsen nga 45 a tonelada tapno saan daytoy a matumba.
Iti rabii ket agsilsilaw daytoy kadagiti nagduduma a maris a manipud kadagiti 53 a ribu dagiti internal light source daytoy.
Handmade ti lantern isu a kasapulan ti 200 traditional lantern makers tapno agtitinnulong iti panagaramid daytoy.
Inaramid ti lantern tapno i-display daytoy iti Luoyang’s Peony Pavillion.
Segun iti designer ti lantern, dinisenio daytoy tapno agbalin a kasukog ti red peony ti official flower ti Luoyang City.