LAOAG CITY – Nagballaag ti National Disaster Risk Reduction and Management Council (NDRRMC) iti posible a panagsuek dagiti debris manipud iti panangirubuat ti rocket ti China a Long March 7A iti kabaybayan nga asideg iti Ilocos Norte ken Cagayan.
Iti maysa a memorandum nga addaan ti petsa nga Hunio 25, inalerto ti National Disaster Risk Reduction and Management Council dagiti maseknan nga ahensia ti gobierno maipapan iti pannakairubuat ti rocket ti China a nakaiskedyul iti nagbaetan ti Hunio 28 agingga Hunio 30.
Naammoan a dagiti paset ti Long March 7A rocket ket manamnama a bumagsak iti uneg ti nadakamat a drop zone a sumurok-kumurang a 75 nautical miles ti kaadayona manipud iti ili ti Burgos, Ilocos Norte ken 126 nautical miles ti kaadayona manipud iti ili ti Santa Ana, Cagayan.
Mainaig iti daytoy, kiniddaw ti National Disaster Risk Reduction and Management Council kadagiti maseknan nga ahensia ti gobierno a mangipatungpal ti temporario a naiget a pagalagadan, pannakaawat ti marino ken dagiti ballaag iti panaglayag iti kabaybayan para iti kinatalged dagiti tattao nga asideg iti nadakamat a drop zone.
Basar iti National Disaster Risk Reduction and Management Council, saan a gutgutiguten ti Philippine Space Agency (PhilSA) ti publiko nga alaen wenno asitgan dagiti debris gapu iti peggad manipud kadagiti makasabidong a substance kas ti rocket fuel.
