LAOAG CITY – Nagpanawagan ti Chinese Embassy iti Pilipinas iti gobierno nga i-ban ti Philippine Offshore Gaming Operations iti pagilian a kaadduan kadagiti karaman ket dagiti Chinese national.
Basar iti Embahada, ipawil ti linteg iti China dagiti amin a klase ti panagsugal. Naiget pay a laplappedan ti gobierno ti China dagiti umili a Tsino a makiramraman iti negosio ti panagsugal iti ballasiw-taaw karaman ti Philippine Offshore Gaming Operations.
Inbatad pay ti embahada a ti Philippine Offshore Gaming Operations ket makadadael iti kapada nga interes ken imahe ti Pilipinas ken China pakairamanan dagiti relasion ti dua a pagilian.
Mainaig iti daytoy, kunana a manarimaanen ti pannakikoordinarda iti gobierno ti China kadagiti otoridad ti Pilipinas maipapan iti Chinese national a karaman kadagiti iligal nga aktibidad iti pagilian.
Naiget pay a maipawil ti awan iti pangibasaran nga akusasion kontra iti China nga adda iti pakainaiganna iti isyu iti Philippine Offshore Gaming Operations.
Inaramid ti Embahada ti China ti nasao a rakurak kas sungbat kadagiti natilawan a Philippine Offshore Gaming Operations hub iti probinsia ti Tarlac ken Pampanga.
