LAOAG CITY – Naipilan ti reklamo a Reckless Imprudence Resulting to Damage to Property kontra iti driver ti Ford Ranger a ni CHU DE YAN, Chinese National, 25, awanan asawa, agpapaay iti Xidian Holdings Phils. Corp., residente iti Heijong Jiang China ngem agdama nga agnanaed iti Brgy. Banban, Bangui, Ilocos Norte kalpasan a naidungpar iti alad a nakairamanan ti nakaparada nga Honda CRV iti Brgy. 2 Poblacion, Pasuquin.
Segun kenni Police Capt. Christian Felix, Chief of police iti PNP iti ili ti Pasuquin, naggapo ditoy ciudad ti Laoag ti nadakamat a driver ken agawid kuma iti ili ti Bangui idi napasamak ti insidente.
Inbatadna a saan da met a maestablisar no sadinno iti naginuman ti nasao a chinese national.
Kunana a saan da unay a makasarita ti driver ti Ford Ranger gapu ta saan a makaawat ti ingles.
Innayonna a manarimaan iti panagsarita dagiti dua a partido.
Iti agdama, nagtalinaed iti kustodyar ti PNP- Pasuquin ni Chu.
