LAOAG CITY – Inpetteng ni Chinese President Xi Jinping a saan a pulos a mabuteng ti pagilyan da kadagiti siasinno man a bully ken kanayon a nakasagana ti China.
Rakurak na daytoy iti grand military parade idiay Beijing kas paset iti selebrasyon iti maika-80 a tawen sipud nagngudo ti World War 2.
Iti panagbitla na ket dinayaw na ti sakripisyo ti pagilyan da para iti human civilization.
Iti maibilang a kadakkelan a military parade, nagatendar pay dagiti 26 nga heads of state pakairamanan da Russian President Vladimir Putin ken North Korean Leader Kim Jong Un.
Daytoy met ti kaunaan a gundaway a nagkakadwa dagiti tallo a lider.
Karaman a naiparada ket ti DF-5C, ti baro a variant ti Dongfeng-5 nuclear intercontinental ballistic missile (ICBM) ti China.
Naamoan a daytoy ket ad-adayo ti madanon na ken iti maysa a missile ket addaan ti 12 a warheads. Daytoy pay ket two-stage nuclear missile nga agusar ti liquid fuel.
Malaksid iti daytoy ket nakita pay ti hypersonic glide vehicles, ti YJ-21 anti-ship cruise missile ken ti JL-3 submarine launched ballistic missile.
Mainaig iti daytoy, kuna ni Meia Nouwens, ti mangidaulo ti China Programme iti International Institute for Strategic Studies a ti naasao a parado ket mangted ti clue iti posible a panangsakop na iti Taiwan.
Segun pay kenkuana, adda pay dagiti banbanag a saan a naipakita iti parada a dagitoy ket napapateg para iti pagilyan da partikular iti pwersa ti People’s Liberation Army no sadinno ket adda ti pakainagan na iti doctrine, ken estratehiya.
