LAOAG CITY – Nangiyuswat ti video call da Chinese President Xi Jinping ken ti Russian counterpart na a ni President Vladimir Putin, sumagmamano nga oras kalpasan a nagsapata ni Donald Trump kas baro a presidente iti Estados Unidos.
Iti panagsarita da Xi ken Putin iti babaen ti video call ket inkari da manen ti ad-adda pay a pannakapatibker ti relasyon ti China ken Russia.
Inpasigurado pay ni Xi nga ad-adda a paigetan da ti strategic coordination, mapatibker ti mutual support, ken masalwadan ti legitimate interests ti dua a pagilian.
Immun-una iti daytoy, nagpangta ni President Trump a mangipataw ti 10% a taripa iti Beijing nga inawagan na kas abuser”, ken nagballaag met a maaddaan ti “big trouble” ti Moscow no saan nga umanamong iti katulagadan tapno agngudon ti gubat iti nagbaetan da ti Ukraine.
Maipalagip a tinawagan ni Xi ni Trump iti napalabas a lawas nga indiskribir met ti US President kas “very good discussion” it dua a pagilian, no sadinno a karaman a napagsaritaan da ket ti maipapan iti trade, fentanyl, TikTok, ken dadduma pay.
Saan met pay a nakasarita ni Putin ni President Trump ngem indanun na ti pangablaaw na kenkuana iti state television na, sumagmamano nga oras sakbay ti inagurasyon.
