LAOAG CITY – Dimmalyasat ti maysa a Chinese research vessel iti archipelagic waters ti Pilipinas basar iti United States maritime expert.
Iti monitoring ni United States maritime expert Ray Powell a dimmalyasat ti Chinese fisheries vessel a Song Hang iti archipelagic waters iti abagatan nga agturong iti Celebes Sea.
Basar iti datos ni Powell, timmalaw ti 85-meter vessel manipud idiay Shanghai, China idi Marso 26.
Ti nasao a Chinese research vessel ket kukua ken imatmatonan ti Shanghai Ocean University.
Immuna iti daytoy, idi 2017 ket naipadamag iti Chinese Communist Party newspaper a ti Song Hang ti kaunaan nga oceangoing fishery survey ship ti China.
Kabayatanna, saan met daytoy ti umuna a gundaway a simrek iti archipelagic waters ti Pilipinas ti research vessel ti China.
Immuna iti daytoy, dimmalyasat idi Pebrero ti maysa a kadakkelan a fisheries research ships ti China a Lan Hai 101.