LAOAG CITY – Bumasbassiten dagiti Chinese vessels a makitkita iti West Philippine Sea no idasig kadagiti naglabas a lawas bayat nga umas-asideg ti panaglippas ti Balikatan exercises iti nagbaetan ti Pilipinas ken Estados Unidos.
Segun ken ni Armed Forces of the Philippines spokesperson Col. Francel Margareth Padilla, immadu ti barko ti China iti West Philippine Sea iti panangrugi ti war games ngem ita a lawas ket awanen ti naobserbaranda a presensiya ti Chinese vessels iti nasao a kabaybayan.
Inbatadna a manipod idi Abril 23 agingga 29, adda ti 110 Chinese maritime militia vessels, 11 China Coast Guard ken 3 People’s Liberation Army-Navy warships ti namonitor iti West Philippine Sea.
Idinto nga idi napalabas a lawas met manipod idi Abril 30 agingga Mayo 6 ket namonitorda laeng ti 88 a Chinese maritime millitia ken 10 a China Coast Guard pakairamanan ti PLAN warships iti nasao a period.
Kabayatanna, kas paset ti agtultuloy a Balikatan exercise, nausat ita nga aldaw ti Mierkoles ti BRP Lake Caliraya a maysa a discarded made in China oil tanker kas mock target iti naisayangkat a sinking exercise a maiwayat iti Brgy. Lapaz ditoy siudad ti Laoag, maysa kadagiti northernmost areas ti pagilian nga asideg iti Taiwan a a nakasango pay iti West Philippine Sea.
