LAOAG CITY – Inpakaammo ti City Health Office ditoy ciudad ti Laoag nga adda manen ti naawat da a supply ti bakuna kontra iti rabies.
Mangnamnama ni Dr. Rodrigo Catcatan Jr. ti mangidadaulo ti City Health Office ditoy ciudad ti Laoag a makaumanay ti naawat da nga anti-rabies vaccine agingga iti maikatlo a quarter ita a tawen.
Inpakaammo na nga alisto a maibus ti supply ti nasao a bakuna gapu ta ado latta dagiti mapan agpabakuna a makagat ken makaramutan ti aso ken pusa iti amakda a maaddaan ti rabies.
Inbatad na a a maipapaay ti bakuna kadagiti umili ngem idi naibusan da ti supply ket kapilitan a nagpagatang da kadagiti pasyente iti ruwar tapno adda ti ibakuna da kadakuada.
Maipalagip nga iti kallabes ket adda ti panagkurkurang ti anti-rabies vaccine ditoy ciudad ti Laoag gapu iti kinabassit ti supply a gatgatengen ti lokal a gobierno kadagiti private manufacturer.
Kabayatanna, inpakaammo ni Catcatan nga agtultuloy a bumabbaba ti kaso ti rabies ita a tawen no ikompara kadagiti naglabas a tawen.
Immunan nga inpakaammo ti City Health Office nga awan pay iti kaso ti human rabies ita a tawen ken maymaysa pay laeng ti aso a nagpositibo ti rabies ditoy ciudad ti Laoag.
