LAOAG CITY – Inpakaammo ni Ms. Rowena Nicolas, Nurse III ti City Health Office ditoy siudad ti Laoag nga adda ti maysa a nagpositibo iti animal rabies ditoy siudad ti Laoag.
Inbatadna a daytoy a klase a dingwen ket maysa nga aso a kukua ti maysa a residente iti Barangay Bacsil ditoy siudad.
Nupay kasta, inlawlawagna nga amin a contact-na daytoy ket nabakunaanen iti anti-rabies vaccine.
Inlawlawagna nga iti napalabas a tawen 2024 ket adu ti nairekord iti City Health Office a nagpositibo iti animal rabies ngem ti pagsayaatanna ket awan ti nagpositibo a tao iti rabies.
Namnamenna a saan nga umadun ti kaso ita tawen iti animal rabies gapu ta makitana nga epektibo ti ar-aramidenda a panagbakuna kadagitoy.
Kabayatanna, dinawat ni Nicolas ti koopreasion dagiti umili a kitaen a naimbag dagiti taraken a dingwen tapno saan a mairisgo ti biag dagitoy kangrunaanna ti biag ti maysa nga indibidual.
