LAOAG CITY – Nagballaag ti Commission on Human Rights (CHR) iti Philippine National Police (PNP) iti plano daytoy a mangiwayat ti door-to-door campaign tapno gutigoten dagiti agtagikua ti paltog nga ag-renew ti lisensiada wenno isuko dagiti saan a lisensiado a paltogda.
Inrakurak ti Commission on Human Rights dagiti rumbeng nga aramiden iti pannakaipatungpal ti “Oplan Katok” nangruna iti campaign period para iti 2025 national and local elections.
Immunan nga inallukoy ni Commission on Elections Chairman George Erwin Garcia ti Philippine National Police nga isuspenso ti “Oplan Katok” iti panawen ti eleksion gapu ta mabalin a mangitunda daytoy ti panagbuteng dagiti botante.
Kabayatanna, inpetteng ti Philippine National Police a mangiruarda ti nayon a pagannurotan tapno maliklikan ti panangabuso ken masigurado ti umiso a pannakaipatungpalna.
