LAOAG CITY – Ilunglungalong ti maysa nga agpanpanday linteg a maipaayan ti christmas bonus ken libre a legal a tulong para kadagiti barangay tanods a gagem a bigbigen ti ipapaayda a serbisio tapno mapagtalinaed ti peace and order kadagiti komunidad.
Inlungalong ni Bicol Saro Partylist Representative Brian Raymund Yamsuan ti House Bill 10909 a mangipaay ti benepisio pakairamanan ti libre a legal assistance ken insurance coverage.
Iti nasao a gakat, maikkan ti prioridad dagiti barangay tanods iti livelihood programs ti national government wenno kadagiti local government units.
Inbatad ni Yamsuan a napateg ti akem dagiti tanod iti komunidad a mangpatalinaed ti kinakappia iti tunggal barangay.
Gapu iti trabahoda ket exposed dagitoy kadagiti kriminal ken maikabil iti risgo ti biagda.
Inlawlawag ti Kongresista a gagemda nga ipangato ti benepisio dagiti tanod nga adda ti umdas a proteksion kontra kadagiti potensial a pangta a mabalinda a sangoen.
Iti kanito nga agbalin a linteg ti House Bill 10909, ti tunggal kualipikado a tanod ket makaawat ti Christmas bonus.
Iti babaen ti nasao a gakat, maipasigurado ti tenure dagiti barangay tanod apaman a madutukan dagitoy.
Kabayatanna, ti Sangguniang Barangay ti agdesision no ikkaten ti maysa a tanod nga adda ti umdas a pangibasaran.
