LAOAG CITY – Inpakaammo ni Mr. Mohammad Dirampatan, maysa kadagiti aglaklako ti Christmas gift wrappers, ayayam ken toroto ditoy siudad ti Laoag a bassit laeng dagiti indibidual a nagturong iti puestoda tapno gumatang kadagiti lakoda ita a bisperas ti paskua.
Segun kenkuana, bimmasit ti naglakuanda ita a tawen no idasig kadagiti napalabas a tawen.
Patienna a dagiti naglabas a bagyo iti kallabes ditoy siudad nangruna ta ado dagiti naapektaran nga umili rason a mabalin a limitado ti gastos dagiti tattao.
Kunana pay nga impababa dagiti presyo ti lako da tapno laeng maallukoy dagiti gumatang idinto nga adda dagiti agsalusod ngem saan dagitoy a gumatang iti lakoda.
Kabayatanna, agbalor iti P25 ti kabassitan a Christmas gift wrapper da agingga iti P50 iti kadakkelan.