LAOAG CITY – Inlawlawag ni Doctor Alan Taylan a ti sakit a Chron’s disease ket saanen a maagasan.
Inbatad na a ti sakit a chron’s disease ket maysa a kondisyon a lumlumteg ti bagis ti maysa a tao.
Kuna na a maalay-ayan laeng ti marikrikna a sakit ti maysa a pasyente babaen ti panagtumar na ti maireseta nga agas.
Segun ken ni Doctor Taylan, karaman kadagiti sintomas a marikna ti addaan ti sakit a chron’s disease ket ti nakaro a panagrugit, agkuttong, alisto a mabannog ken dadduma pay.
Innayon na a mabalin a maaddaan ti nasao a sakit gapu iti nakaro nga stress, saan nga usto a panagdiyeta, matawid, ken adda pay ti risgo na ti panagus-usar ti over-the-counter nga anti-inflammatory ken ti nakaro a panagsigarilyo.
Nupay kasta, kuna ni Taylan a saan pay a naamoan no ania ti pudno a makaigapu ti pakaalaan ti nasao a sakit.
Gapu iti daytoy, inbalakad ni Doctor Taylan a masapol a liklikan ti agipauneg kadagiti saan a nasustansya a makan ken ikkaten ti bisyo kas ti panagsigarilyo.
