LAOAG CITY – Naglikudan ti chairman ti House Committee on Good Government ti rakurak ni Vice President Sara Duterte a naminsan a daras laeng daytoy a naimbitaran iti imbestigasion maipanggep iti kwestionable a panaggastos daytoy iti P612.5 a milyon a confidential fund.
Segun ken ni Manila 3rd District Rep. Joel Chua, inkarigatan ti komite a maipaay ken ni Duterte ti imbitasion iti panagdengngeg.
Im-imbestigaren ti komite ni Chua ti maipagarup a biddot a panagusar ti P612.5 a milyon a confidential funds a nailatang iti Office of the Vice President ken iti Department of Education a dati nga indauloan ni Duterte.
Maisupadi iti rakurak ni Duterte a naminsan laeng a daras a naimbitaran isuna isu nga inlawlawag ni Chua a naimbitaran ti Bise Presidente iti immuna ken maikadua a panagdengngeg a naiyuswat idi Setiembre 18 ken 25.
Iti surat nga addaan ti petsa a Setiembre 23 nga inpatulod ken ni Chua, nagkedked a nagatendar ni Duterte kadagiti simmaruno a panagdengngeg, nadakamat dagiti isyu maipanggep iti konstitusional ken kinunana a saanen a kasapulan ti imbestigasion gapu ta mabalin a beripikaren dagiti alegasion babaen kadagiti pampubliko a rekord.
Binabalaw met ni Duterte dagiti pagannurotan ti Kamara a posible nga aglablabsing kadagiti karebbengan nga inkeddeng ti Konstitusion. Dinakamatna pay dagiti kapada nga isyu ket nakapenpen iti Korte Suprema.
Iti panagdengngeg ti House Quad Committee idi Mierkoles no sadinno a nagatendar ti amana a ni dati a Presidente Rodrigo Roa Duterte, personal nga inpaay iti Bise Presidente ti imbitasion para iti maikanem a panagdengngeg a naikeddeng inton Nobiembre 20.
Nupay kasta, iti maysa a press conference iti Senado idi Huebes, inbatad ni Duterte nga awan ti naawatna a dadduma pay nga imbitasion kalpasan a nagatendar iti umuna a panagdengngeg.
