LAOAG CITY – Manarimaan ti panagsagsagana ti City Agriculture Office ditoy siudad ti Laoag para iti Agro Industrial trade fair iti mapaspasangasangan a fiesta ditoy siudad ti Laoag.
Segun ken ni Engr. Shiela Opelac, mangidadaulo iti nasao nga opisina, napintas dagiti makita iti trade fair ita gapu ta inprioridadda dagiti aramid a produkto dagiti mannalon ditoy siudad.
Inbatadna nga adda ti 10 a clustered barangay a mangitampok kadagiti kabukbukudanda a produkto.
Inlawlawagna a daytoy ti inaramidda tapno matulungan dagiti mannalon a makalako.
Malaksid iti daytoy, inpakaammona nga adda pay ti 15 nga aldaw a pannakaisayangkat ti Kadiwa ng Pangulo iti sangoanan ti Laoag City Hall.
Mangnamnama ni Opelac a babaen iti daytoy ket makatulong kadagiti umili kangrunaanna kadagiti benepisiario iti daytoy a programa a makagatang iti nalaka a presio.
