LAOAG CITY – Nagpalagip ti City Agriculture Office kadagiti mangngalap ditoy siudad ti Laoag maipanggep iti kinabara ti panawen.
Segun ken ni Engr. Shiela Opelac, mangidadaulo ti City Agriculture Office ditoy siudad ti Laoag a kasapulan a kitaen a naimbag dagiti mangngalap dagiti tarakenda nga ikan tapno saan a matay.
Inbatadna a rumbeng a saan unay a kaadoen dagiti mangngalap kangrunaanna kadagiti addaan ti piskaria a pagtaraknan kadagiti ikan gapu ta mabalinda nga ipatay iti kinabara ti panawen.
Nupay kasta, inpasigurado ti City Agriculture Office iti naan-anay a suporta kadagiti mangngalap babaen ti panangipaay dagitoy ti masapolda kas ti 62-footer boat with tuna handline ken dagiti dadduma pay a kagamitan a pagkalap.
Kabayatanna, inpakaammo ni Engr. Opelac a saan nga agpangadua nga umasideg iti opisina gapu ta kanayon a sidadaan dagitoy no adda dagiti agpatulong.
Immuna iti daytoy, dakkel a pukaw dagiti mangngalap iti Barangay Lapaz ditoy siudad ti Laoag iti pannakatay dagiti tarakenda nga ikan gapu ta daytoy ti kangrunaan a pagsapulanda ken pagbiaganda.
