LAOAG CITY – Regular a panagsursor kadagiti mannalon tapno makita dagiti situasion dagiti mula ken masigurado a napintas dagiti apitda iti baet iti kinabara ti panawen.
Daytoy ti aramiden ti City Agriculture Office ditoy siudad ti Laoag nga idadauloan ni Engr. Shiela Opelac.
Segun kenkuana, dagiti mannalon ti kangrunaan a maapektaran ti napudot a paniempo isu a masapolda ti agdama ti makinaria a mausar a pagpadanum kadagiti mula dagitoy.
Inbatadna nga adda metten ti naipaay kadakuada a farm machinaries kas ti water pump with irrigation hose ken dagiti dadduma pay a kasapulan dagiti mannalon para iti pannakapasayaat ti apit dagitoy.
Malaksid iti daytoy, kunana a dakkel pay a makatulong kadakuada ti pannakaipasdek dagiti solar irrigation system iti nagduduma a paset ditoy siudad.
Mainag iti daytoy, nagpalagip ni Engr. Opelac kadagiti mannalon a no makitadan a mayaten a maapit dagiti mulada ket apitendan tapno saan a maperdi dagitoy ken saan nga umadu ti gastosenda.
Kabayatanna, para met iti panagsagsagana kadagiti main crop ket masapol nga iyurayda ti bilin ti opisina ti City Agriculture Office no kaano a mabalin ti panagbunubon tapno saan met a masayang dagiti ibunubonda.
Immuna iti daytoy, addan dagiti sumagmamano a mannalon ditoy siudad a naapektaran ti mulada a pagay ken mais gapu iti kinabara pay laeng ti panawen.
