LAOAG CITY – Patien ni Engr. Shiela Opelac, ti City Agriculturist a ti nababa a salinity level ti danom iti nakapupokan dagiti taraken nga ikan dagiti mangalap iti Metro Lapaz ti kangrunaan a rason no apay a matmatay dagiti pupok da.
Segun ken Opelac, apaman a rimsua ti problema dagiti mangalap iti Barangay 32-A La Paz ditoy ciudad ti Laoag ket nangisayangkatda a dagus ti imbestigasyon iti babaen ti Agriculture Extension Workers nga idadauluan ni Ms. Ligaya Barroga, agraman ti Fishery coordinators.
Iti naisayangkat nga initial turbidity test ken refract meter test ket nakita da a saan met a nalibeg ti danom ngem nababa ti salinity level ti danom.
Gapu iti daytoy, nangisayangkat da manen ti sabali a salinity test ken turbidity test ket ditoy a natakuatan nga umabot laeng iti 0 agingga 4 percent ti salinity ti danom.
Inlawlawag ni Opelac a ti malaga ket kasapulan na ti umdas a timpla ti saline water idinto a dagiti tilapia a pupok da ket adda posibilidad a pang-saline water met laeng dagitoy.
Malaksid iti daytoy naammuan pay nga idi maikadua a daras a nangisayangkat ti nasao a pangopisinaan ti turbidity test ket ditoy a natakuatan a nakaro unay ti libeg ti danom.
Kunana a no nalibeg unay ti danom, bumaba ti oxygen level danom a mangitunda ti ipapatay dagiti pupok da nga ikan.
Nu pay kasta, inpettengna a saan nga umdas a ti laeng quarry opreration iti Barangay Talingaan ti mababalaw iti ipapatay dagiti pupok da nga ikan gapu ta posible nga addada pay dredging activities iti surong a paset ti Padsan River.
Mainaig iti daytoy binallaagan ni Opelac dagiti mangalap iti Metro Lapaz a no kabaelan da pay laeng nga apiten dagiti pupokda tapno maiyakar iti lugar nga adda umdas a saline water-na ket aramiden da.
Kabayatanna, inpasigurado na ti naan-anay a tulong ti Department of Agriculture kadagiti mangalap iti Metro Lapaz.
