LAOAG CITY – Inadmitir ni Engr. Shiela Opelac, City Agriculturist ditoy siudad ti Laoag a saan nga umdas ti crop insurance a sukat ti pukaw dagiti mannalon gapu iti iduduprak ti Bagyo Julian.
Segun kenkuana, nakasagana met dagiti agricultural inputs a kasapulan dagiti mannalon a maipaay kadakuada.
Inbatadna a dumanon iti 56 a milyon a pisos ti balor ti pannakadadael iti benneg ti agrikultura gapu iti nasao a bagyo.
Inlawlawagna a ti panagtalon ket kasla sugal gapu ta iti baet nga adda dagiti posible a sumangbay a didigra ket agtalonda latta.
Kunana a saan met a baybay-an dagiti maseknan nga opisina ti gobierno dagiti maap-apektaran a mannalon gubuay iti bagyo.
Innayonna nga ikarkarigatanda nga agbirok kadagiti nagduduma a wagas tapno matulungan dagiti maseknan a mannalon.
