LAOAG CITY – Napaay ni Engr. Shiela Opelac, City Agriculturist kalpasan a saan a tinungpal ti National Irrigation Administration ti kiniddawna a 100 a sako a Bagong Bayaning Magsasaka Rice tapno mailako iti Kadiwa Store iti sangoanan ti City Hall ditoy siudad ti Laoag.
Segun kenkuana, inpakaammo ti National Irrigation Administration kadakuada dagiti masapol a requirements nga ipakita dagiti mapan gumatang iti Bagong Bayaning Magsasaka Rice.
Inbatadna a nakikoordinarda pay kadagiti maseknan a pangopisinaan kas ti General Services Office, City Engineering Office ken ti City Social Welfare and Development Office tapno maipasigurado a maakomodar dagiti kualipikado a benepisiario ti programa.
Nupay kasta, inlawlawagna nga adda ti naawatna a tawag manipud iti maysa kadagiti staff ti National Irrigation Administration nga inbagana kenkuana a saan a makastrek ti truck iti sangoanan ti City Hall.
Gapu iti daytoy, kiniddawna kadakuada nga isuda laengen ti mapan mangala dagiti sinako a Bagong Bayaning Magsasaka Rice iti sangoanan ti Kapitolio Probinsial ngem saanda a pinatgan.
Kunana a nakaawat isuna ti maudi a tawag a mangipakpakaammo a ti Bagong Bayaning Magsasaka Rice ket mailako lattan iti sangoanan ti Kapitolio Probinsial a saan ket di iti sangoanan ti City Hall.
Mainaig iti daytoy, naammoan nga adda ti dua a naka-enroll iti Contract Growing Scheme ti National Irrigation Administration a pakairamanan ti Brgy. Bengcag ken Brgy. Tangid.
Babaen iti daytoy a programa ket nakikontratada iti National Irrigation Administration tapno dagiti apit dagiti 48 mannalon manipud kadagiti nasao a barangay ket alaento met laeng ti nasao nga ahensia.
Innayon ti City Agriculturist a mailako dagitoy babaen iti Kadiwa Store wenno dagiti dadduma pay a market outlets.
