LAOAG CITY – Nadismaya ni Mrs. Luz Cariaga iti Barangay San Pedro iti ciudad ti Batac gapo kadagiti dingwen kas iti baka a maiwaywayway iti City Cemetery iti Barangay Tabug a nakaitaneman ti asawa na.
Segun kenni Cariaga, nakita na a mismo a dagiti baka ket adda iti nasao a kamposanto a rason ti pannakadadael ti tiles iti tanem ti asawa na.
Inlawlawag na a tunggal mapan iti kamposanto ket maupay gapo ta dagiti rugit ti baka ti makita na no sadinno ket ditoy pay a maipagarop nga agapon dagiti baka.
Kunana nga indanon na metten daytoy idi iti lokal a gobierno ngem awan ti aksyon rason nga agpapan iat ket daytoy ti dakkel a problema da.
Inpetteng na a kabaelan da a dalus ti tanem ti asawa na no ado dagiti ruruot ken no narugit ti aglawlaw.
Kabayatanna, nakumpirmaran a mismo ti Bombo Radyo nga adda ti maysa a baka iti nasao a kamposanto.
Nupay maysa laeng ti nakita a baka iti panagturong ti grupo ti Bombo Radyo ket adda dagiti senyales nga ado ti maiwaywayway iti kamposanto gapo kadagiti rugit ti baka ken kalding.
Mainaig iti daytoy, kuna ni Baranagy Chairman Arnold Alibuyog iti Barangay Tabug nga adda ti nakaipan a placard a mangibagbaga a maiparit ti agiwayway ti dingwen rason a nasdaaw no apay nga awanen ti makita a placard.
Kuna met ni Engr. Noralyn Manahan, head ti City Planning Development Office iti nasao a ciudad nga adda met ti dumandanon kadakuada a damag ken plano da a mangideploy ti caretaker iti nadakamat a kamposanto ket addan ti pondo na iti daytoy.
