LAOAG CITY – Napagtutulagan dagiti traysikelan iti naiyuswat a public consultation a dagiti laeng City Franchise Holder ti mabalin nga agpila iti maipatpatakder a mall iti paset ti Barangay Nangalisan ditoy ciudad ti Laoag.
Daytoy ti inbatad ni Konsehal James Bryan Alcid, ti chairman ti Committee on Transportation ditoy ciudad.
Iti public consultation, napagsasaritaan dagiti maseknan a tricycle drivers ken operators no siasinno ti rumbeng nga agpila iti maipatpatakder a mall gapu ta agpada nga interesado dagiti barangay franchise holder ken City Franchise holder.
Kuna ni Alcid a ti napagnunumoan dagiti maseknan ket dagiti laeng City Franchise Holder ti mabalin nga agpila iti maipatpatakder a mall gapu ta daytoy ti naipalaon iti ordinansa ditoy ciudad.
Mainaig iti daytoy, naibalakad kadagiti city franchise holder nga awan ti nakikappengan na a Tricycle Operators and Drivers’ Association (TODA) a masapol a maki-miembro da.
Inlawlawag ni Alcid a ti maaramid apaman a mangrugi ti operasyon ti mall ket adda ti aldaw a maited iti kada Tricycle Operators and Drivers’ Association ditoy ciudad tapno isu laeng ti panagpila da iti nasao a pasdek negosyo.
