LAOAG CITY – Nagun-od ti City Government of Laoag ti umuna pwesto, kadagupan dagiti amin a ciudad ditoy Rehiyon Uno ti “2024 regional Subaybayani awards” iti babaen ti Department of the Interior and Local Government (DILG).
Ti nasao a pammadayaw ket inawat a mismo ni Mayor Michael Marcos Keon idiay iti ili ti San Juan, La Union.
Daytoy a panagballigi ket nagipaay ti gundaway iti ciudad ti Laoag a mangirepresentar ti Rehiyon Uno iti City Category in National Level.
Naamuan a ti Subaybayani awards ket ipapaay ti Department of the Interior and Local Government kadagiti ciudad a makita da a napintas ken naurnos ti pannakamanehar ken panakaimplementar dagiti nagduduma a programa ti lokal a gobierno.
Maipalagip nga idi tawen 2023 ket napadayawan ti ciudad ti Laoag kas top 3 overall performer a ciudad iti intero a pagilyan, rason a mangnamnama daytoy a maartapan pay daytoy a pwesto.
Malaksid iti daytoy, naminsan manen a nakapasa ti nasao a ciudad iti Seal of Good Local Governance.
