LAOAG CITY – Naragsak nga inpakaammo ni Ms. Mary Jane Leaño, mangidadaulo ti Communications and Media Office ditoy siudad ti Laoag a naiget nga agsagsaganan ti City Government of Laoag para iti Pamulinawen Festival.
Segun kenkuana, naidumduma dagiti maisayangkat nga aktibidad ken programa tapno adda met ti maidiaya a sabsabali para kadagiti umili.
Inlawlawagna nga adda ti lima a pakabuklan a pageant a maiyuswat kabayatan iti fiesta pakairamanan ti Miss Laoag, Little Mr. & Miss Laoag, Mister Laoag, Milestone King & Queen para kadagiti senior citizens ken ti Pamulinawen Queen para kadagiti kameng ti Lesbian, Gay, Bisexual, Transgender and Queer Community no sadinno amin dagitoy ket maiyuswat iti Ilocos Norte Centennial Arena.
Kunana a dagiti kandidata iti Miss Laoag ket baklayen ti barangay ti make up ken gown dagitoy idinto a dagiti dadduma a kasapulan ket ipaay amin ti lokal a gobieno.
Inbatadna a kadagupan kadagiti 80 a barangay ditoy siudad ti Laoag ket addan ti 18 a kandidata ti nagkumpirmar a makipaset iti nasao a beauty pageant.
Innayonna a dagiti requirements ti makipaset iti Miss Laoag ket masapul nga agtawen ti 16 agingga iti 25, barangay certification ken awan ti height requirement ita a tawen.
