LAOAG CITY – Inpakaammo ni Dr. Rodrigo Catcatan, mangidadaulo ti City Health Office ditoy siudad ti Laoag a saan pay nga accredited ti opisinada iti Primary Health Care ti Department of Health.
Segun kenkuana, no ti maysa a Rural Health Unit ket accredited iti Primary Health Care ket ad-adu met ti sakupna a benepisio kas ti libre nga agas, laboratorio ken dadduma pay.
Nupay kasta, kuna ni Dr. Catcatan a nagaplikarda met daytoyen babaen iti permit to construct a daytoy ti maysa a wagas a pangrugianna tapno agbalin nga accredited ti City Health Office.
Inbatadna a mapandanto pay laeng alaen daytoy iti regional office kalpasanna ket agipasada ti license to operate iti Department of Health.
Kunana nga inpadasda pay ti RHU 3 ngem saan daytoy a pimmasa isut gapuna nga adda ti pannakabalbaliw dagiti requirements ken namnamaenna a babaen ti panagkikinnammayetda ket agbalin ti opisinada a primary facility iti mabiit.
